सवारी अभावले हिउँमा फसेकाहरुको उद्दार गर्न कठिन

मनाङ,१२ कार्तिक । मनाङमा भारी हिमपातपछि जनजीवन प्रभावित भएको छ। हिउँमा फसेका पर्यटकको उद्धारका लागि सुरक्षा निकाय बिहानैदेखि खटिएका छन् तर सवारी साधनको अभावले उद्धार कार्यमा कठिनाइ भएको छ।

प्रमुख जिल्ला अधिकारी नवराज पौड्यालका अनुसार हिउँमा फसेका पर्यटकलाई उद्धार गरिँदैछ तर सवारी साधन हिउँमा फसेका र अन्य सवारी अभाव भएकाले समस्या भएको हो।
‘फसेका पर्यटकको उद्धार जारी छ। तर हिउँमा सवारी फसेका र अन्य सवारी साधन अभाव भएकाले कठिनाइ भइरहेको छ,’ उनले बताए।

उनका अनुसार तिलिचो आधार शिविरमा अलपत्र परेका पर्यटकलाई उद्धार गरिएको छ भने खाङ्सार क्षेत्रमा अन्य व्यवस्थापन गरिएको छ। साथै, करिब २५ किलोमिटर सडकमा हिउँ हटाएर आवागमन सहज बनाइएको उनले जानकारी दिए।

स्थानीय पर्यटन व्यवसायीका अनुसार केही पर्यटकलाई घरबास र केहीलाई निजी घरमा राखेर व्यवस्थापन गरिएको छ। सबै विदेशी पर्यटक सुरक्षित रहेको पनि उनीहरूले बताएका छन्।