अब प्यान कार्ड स्थानीय तहबाटै

काठमाडौ,२० कार्तिक । अब स्थायी लेखा नम्बर (प्यान) कार्ड स्थानीय तहबाट नै वितरण गरिने भएको छ।

आन्तरिक राजस्व विभागले एक विज्ञप्ति जारी गर्दै प्यान कार्डसहित करसम्बन्धी विभिन्न सेवा स्थानीय तहबाटै उपलब्ध गराउने व्यवस्था गरिएको जनाएको छ। यसअघि प्यान कार्ड करदाता सेवा कार्यालयमार्फत मात्र प्रदान हुँदै आएको थियो। तर हाल ती कार्यालयहरू खारेज भइसकेका छन्।

विभागका अनुसार, स्थानीय तहबाट सेवा सञ्चालन गर्न केही समय लाग्न सक्ने भएकाले तत्कालका लागि सम्बन्धित जिल्लाको कोष तथा लेखा नियन्त्रक कार्यालयबाट नै सेवा प्रदान गर्ने व्यवस्था गरिएको छ।

त्यसैगरी, कर भुक्तानी र कर चुक्ता प्रमाणपत्रजस्ता सेवा अनलाइन प्रणालीमार्फत नै प्राप्त गर्न सकिने विभागले स्पष्ट पारेको छ। विभागले करदातालाई नजिक र प्रविधिमैत्री सेवा उपलब्ध गराउँदै लैजाने नीति अवलम्बन गरिएको पनि जनाएको छ।