दुर्गा प्रसाईंलाई २४ घण्टाभित्र अदालतमा हाजिर गराउन सर्वोच्चको आदेश

काठमाडौ,४ मंसिर । सर्वोच्च अदालतले नागरिक बचाउ महाअभियानका संयोजक दुर्गा प्रसाईंलाई २४ घण्टाभित्र अदालतमा उपस्थित गराउन आदेश दिएको छ।

प्रसाईंका छोरा निराजनले दायर गरेको बन्दीप्रत्यक्षीकरण रिटमाथि सुनुवाइ गर्दै न्यायाधीश मेघराज पोखरेलको इजलासले कारण देखाऊ आदेशसहित प्रसाईंलाई सशरीर उपस्थित गराउन निर्देशन दिएको हो।

विरोध प्रदर्शनको चेतावनी दिएपछि सार्वजनिक शान्तिविरुद्धको अभियोगमा पक्राउ परेका प्रसाईंलाई प्रशासनको अनुमति लिएर चार दिन थुनामा राखिएको थियो। थुना गैरन्यायिक रहेको दाबी गर्दै निराजनले उनलाई तत्काल थुनामुक्त गर्न मागसहित बन्दीप्रत्यक्षीकरण रिट दायर गरेका थिए।