दाङ टेक्निकलमा नवप्रवेशी विद्यार्थीको स्वागत

दाङ,१६ माघ ।दाङ टेक्निकल इन्स्टिच्यूट प्रा.लि. (एच.ए. तथा ल्याब टेक्निसियन कलेज), तुलसीपुर–६, दाङले नवप्रवेशी विद्यार्थीहरूको स्वागत कार्यक्रम सम्पन्न गरेको छ।

कलेजका अध्यक्ष तथा प्रमुख दोर्ण बहादुर वलिको अध्यक्षतामा तथा तुलसीपुर उपमहानगरपालिकाका प्रमुख प्रशासकीय अधिकृत केशव राज पार्धेको प्रमुख आतिथ्यता एवं कलेजका सञ्चालक विमल रिजालको विशिष्ट आतिथ्यतामा कार्यक्रम भएको हो।

प्रमुख अतिथि केशव राज पार्धेले जीवन निरन्तर गतिशील रहने भएकाले समयअनुसार आफूलाई परिवर्तनशील बनाउनु आवश्यक रहेको बताए। उनले उज्ज्वल भविष्य निर्माणका लागि उक्त कलेज छनोट गर्नु सही निर्णय भएको उल्लेख गर्दै कलेजले हालसम्म हजारौँ स्वास्थ्यकर्मी उत्पादन गरिसकेको जानकारी दिएका थिए।

कार्यक्रममा बोल्दै सामान्य चिकित्सा प्रथम वर्षका विद्यार्थी लाल बहादुर पुनले अनुशासन, जोस र जाँगरका साथ उज्ज्वल भविष्य निर्माणका लागि उक्त कलेज रोजेको बताएका थिए। उनले कलेजमा उपलब्ध अवसरको सदुपयोग गर्दै जिम्मेवार नागरिकका रूपमा अघि बढ्ने प्रतिबद्धता व्यक्त गरेका थिए।

त्यस्तै, प्रथम वर्षकै विद्यार्थी लक्ष्मी वलिले स्वास्थ्य क्षेत्रमा भविष्य सुनिश्चित गर्न यो विषय छनोट गरेको बताउँदै कलेजको शैक्षिक वातावरण, सहयोगी व्यवहार तथा व्यवस्थित छात्रावास व्यवस्थापनप्रति सन्तुष्टि व्यक्त गरेकी थिइन्।

पत्रकार दिपक बोहराले नवप्रवेशीलाई स्वागत र अध्ययन पूरा गरेका विद्यार्थीलाई विदाइ गर्ने संस्कार सकारात्मक रहेको उल्लेख गरेका थिए। उनले स्वास्थ्य क्षेत्रमा प्रवेश गर्ने विद्यार्थीबाट जनताले गुणस्तरीय सेवा पाउने विश्वास व्यक्त गर्दै दक्ष जनशक्ति विदेश पलायन हुने प्रवृत्ति न्यूनीकरण गर्न स्व–रोजगारमूलक शिक्षामा जोड दिनुपर्ने बताएका थिए।

विशिष्ट अतिथि विमल रिजालले दाङ टेक्निकल इन्स्टिच्यूटको वास्तविक गहना विद्यार्थीहरू नै भएको उल्लेख गर्दै उनीहरूको क्षमता विकासमा कलेज सदैव प्रतिबद्ध रहने बताएका थिए।

कार्यक्रमका सभापति दोर्ण बहादुर वलिले अनुशासनबिना गुणस्तरीय शिक्षा सम्भव नहुने उल्लेख गर्दै वि.सं. २०५४ सालदेखि कलेजले अनुशासनयुक्त र दक्ष स्वास्थ्य जनशक्ति उत्पादन गर्दै आएको जानकारी दिए।

कार्यक्रममा विद्यार्थीहरूले स्वागत गीत, गजल तथा विभिन्न सांस्कृतिक प्रस्तुति प्रस्तुत गरेका थिए। कार्यक्रमको सञ्चालन कलेजका प्रधानाध्यापक अशोक कुमार यादव र विद्यार्थी चेतना वलिले संयुक्त रूपमा गरेका थिए।

कार्यक्रममा कलेजका सञ्चालकहरू हेमराज बस्नेत, सञ्जीवन रिजाल, प्रा. डा. सन्दीपन न्यौपाने, हेमराज बुढा, सुप्रभा दाहाल, हिमाल खड्का, विशाल न्यौपाने, सन्दिप कुमार शाह तथा पत्रकारहरू दर्शन आचार्य, दिपक बोहरा, टेकराज भण्डारीलगायतको उपस्थिति रहेको थियो।