राजमार्ग आसपासमा अवैध रुख कटानः गाउँपालिका अध्यक्षसहित आठजना दोषी ठहर

दाङ,८ पुस। पूर्व–पश्चिम राजमार्ग आसपास बिना अनुमति रुख कटान गरिएको घटनामा राप्ती गाउँपालिकाका अध्यक्षसहित ८ जना जनप्रतिनिधि तथा संलग्न व्यक्ति दोषी ठहर भएका छन्।

दाङ देउखुरी जिल्ला अदालतले राप्ती गाउँपालिकाका अध्यक्ष प्रकाश विष्ट, तीन जना वडाध्यक्ष तथा अन्य संलग्न व्यक्तिहरूले सडक क्षेत्राधिकारभित्र पर्ने रुखहरू कानुनी प्रक्रिया पूरा नगरी काटी काठ ओसारपसार गरेको ठहर गर्दै सजाय सुनाएको हो। जिल्ला न्यायाधीश राजेश्वर अर्यालको एकल इजलासले पुस २ गते उक्त मुद्दामा फैसला गरेको अदालतका सूचना अधिकारी गोकर्ण वलीले जानकारी दिए।

अदालतले वडा नम्बर ४ का वडाध्यक्ष वीरबहादुर चौधरीलाई एक महिना कैद र १ लाख ४१ हजार २ सय २६ रुपैयाँ बिगो तिर्न आदेश दिएको छ। अध्यक्ष प्रकाश विष्टसहित वडा नम्बर १ का वडाध्यक्ष गेमे खड्का, वडा नम्बर ५ का वडाध्यक्ष देवप्रसाद चौधरी तथा काठ खरिदकर्ता र अन्य संलग्न व्यक्तिहरूलाई १५–१५ दिनको कैद सजाय तोकिएको छ।

तर, घटनासँग जोडिएका तत्कालीन सडक डिभिजन कार्यालय दाङका प्रमुख रामपुकार जैसवाललाई भने प्रमाण नपुगेको भन्दै अदालतले सफाइ दिएको छ। डिभिजन वन कार्यालय दाङका सहायक वन अधिकृत छोटेलाल चौधरीले २०८० मंसिर १० गते अध्यक्ष विष्टसहित ९ जना विरुद्ध मुद्दा दायर गरेका थिए।