मानव अधिकार आयोगको प्रतिवेदन कार्यान्वयन गर्न लिङ्देनको माग

काठमाडौ,१५ जेठ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन ले मानव अधिकार आयोगको प्रतिवेदन तत्काल कार्यान्वयन गर्न सरकारसँग आग्रह गरेका छन्।

पार्टी स्थापना दिवसको अवसरमा आयोजित कार्यक्रममा बोल्दै उनले उक्त प्रतिवेदनले गम्भीर विषयहरू उजागर गरेको भन्दै त्यसलाई कार्यान्वयनमा लैजान ढिलाइ गर्न नहुने बताएका हुन्। साथै, आयोगले दोषी ठहर गरेका व्यक्तिहरूले पनि कानुनी प्रक्रिया पूरा गरी छिटो सफाइ लिनुपर्नेमा उनले जोड दिए।

लिङ्देनका अनुसार उक्त प्रतिवेदन नेपालभित्र मात्रै सीमित नरही अन्तर्राष्ट्रिय स्तरमा समेत अभिलेख रहने भएकाले यसमा संलग्न व्यक्तिहरूका लागि यो संवेदनशील विषय हो। उनले यस्ता प्रतिवेदनहरू संयुक्त राष्ट्रसंघजस्ता अन्तर्राष्ट्रिय निकायसँग पनि सम्बन्धित हुने भएकाले त्यसको प्रभाव व्यापक हुन सक्ने बताए।

अध्यक्ष लिङ्देनले सरकारले प्रतिवेदन कार्यान्वयनतर्फ सक्रियता देखाउनुपर्ने आवश्यकता औंल्याउँदै दोषी ठहर गरिएका व्यक्तिहरूले ढिलाइ नगरी आफ्नो सफाइका लागि प्रक्रिया अघि बढाउनुपर्ने धारणा राखे।

यसै अवसरमा उनले राप्रपालाई मुलुकको एक वैकल्पिक राजनीतिक शक्तिका रूपमा अघि बढाउन सबै नेता तथा कार्यकर्तालाई एकताबद्ध हुन आह्वान पनि गरेका छन्।