दाङ,३० जेठ । दाङको कालाकाटे–सिक्टा हुलाकी सडक निर्माणस्थलमा जेसिबीले फालेको बालुवामा पुरिँदा एक मजदुरको मृत्यु भएको छ।
गढवा गाउँपालिका–२ का ४५ वर्षीय लालमणि यादव शनिबार बिहान करिब साढे ९ बजे काम गरिरहेकै क्रममा बालुवामा पुरिएका थिए। उनी बज्रगुरु कान्छाराम जेभी कन्ट्रक्सन प्रालिद्वारा सञ्चालित बिटुमिन (अलकत्रा) प्लान्टमा कार्यरत थिए।
प्रहरीका अनुसार यादव काम गरिरहेको जानकारी नपाई जेसिबी चालकले बालुवा फालेपछि उनी पुरिएका थिए। गम्भीर घाइते भएका यादवलाई उपचारका लागि लमही अस्पताल लगिएको थियो, जहाँ उनको मृत्यु भएको हो।
घटनापछि जेसिबी र चालक अनिलकुमार थारुलाई इलाका प्रहरी कार्यालय गढवाले नियन्त्रणमा लिई थप अनुसन्धान सुरु गरेको छ।
प्रतिक्रिया दिनुहोस