काठमाडौ,१० कार्तिक । शिक्षा, विज्ञान तथा प्रविधि मन्त्री महावीर पुनले आफूलाई कुनै पनि उद्घाटन, शिलान्यास वा प्रमुख अतिथिको रूपमा कार्यक्रमहरूमा निमन्त्रणा नगर्न आग्रह गरेका छन्।
मन्त्री पुनले सोमबार सामाजिक सञ्जालमार्फत जनाएका छन्, “कृपया कसैले पनि र कहीँबाट पनि उद्घाटन/शिलान्यास कार्यक्रम, प्रमुख अतिथि हुनेजस्ता कुनै पनि औपचारिक कार्यक्रमहरूमा निमन्त्रण नगर्नु होला।”
उनले संयुक्त राष्ट्रसंघको उज्बेकिस्तान महासभा र ब्रिटिस काउन्सिलले नाइजेरियामा आयोजना गरेको सम्मेलनमा समेत सहभागिता नजनाएको उल्लेख गर्दै आफू अनावश्यक औपचारिक कार्यक्रममा नजाने बताएका छन्।
पुनले अनिवार्य सहभागिता आवश्यक हुने बैठक वा कार्यगत भ्रमणबाहेक अन्य कार्यक्रममा नगइने स्पष्ट पार्दै केही मन्त्री विदेश भ्रमणमा गएको विषयमा हल्ला नफैलाउन पनि आग्रह गरेका छन्।
उनले लेखेका छन्, “जानै पर्ने र नगई नहुने मिटिङमा मात्र केही मन्त्रीहरू विदेश जानु भएको हो। त्यसैले ‘विदेश घुम्न गयो’ भनेर हल्ला नगर्नु होला।”
प्रतिक्रिया दिनुहोस