लुम्बिनीको नयाँ आर्थिक नियमावली स्वीकृत

दाङ,२९ जेठ । लुम्बिनी प्रदेश सरकारको मन्त्रिपरिषद् बैठकले प्रदेश आर्थिक कार्यविधि तथा वित्तीय उत्तरदायित्व सम्बन्धी नियमावली, २०८३ स्वीकृत गरेको छ।

मुख्यमन्त्री चेतनारायण आचार्यको अध्यक्षतामा बिहीबार साँझ बसेको बैठकले आर्थिक मामिला तथा योजना मन्त्रालयले पेश गरेको नियमावली पारित गरेको हो।

सरकारका प्रवक्ता तथा स्वास्थ्य मन्त्री रामजीप्रसाद घिमिरेका अनुसार नयाँ नियमावली लागू भएसँगै बजेट कार्यान्वयन र वित्तीय व्यवस्थापन थप प्रभावकारी, सहज र उत्तरदायी बन्ने अपेक्षा गरिएको छ।

यसअघि आन्तरिक रकमान्तरका लागि सम्बन्धित मन्त्रालयले आर्थिक मामिला तथा योजना मन्त्रालयको स्वीकृति लिनुपर्ने व्यवस्था रहेकामा अब प्रक्रिया सरल बनाइएको छ।

यस्तै, योजना संशोधन गर्ने अधिकार सम्बन्धित मन्त्रालयलाई नै दिइएको छ, जसले योजना कार्यान्वयनमा हुने ढिलासुस्ती घटाउन सहयोग पुग्ने विश्वास गरिएको छ।