ट्रकको ठक्करबाट सशस्त्र प्रहरी सहायक हवल्दारको मृत्यु
जेठ ३१, २०८३
बर्दिया,३१ जेठ । बर्दियामा ट्रकको ठक्करबाट सशस्त्र प्रहरीका सहायक हवल्दारको मृत्यु भएको छ।
बाँसगढी नगरपालिका–५ मोतिपुरका ३५ वर्षीय सहायक हवल्दार कँडेललाई आइतबार बिहान गुलरिया नगरपालिका–११ लालपुरमा ट्रकले ठक्कर दिएको थियो।
गम्भीर घाइते भएका उनलाई उपचारका लागि जिल्ला अस्पताल गुलरिया पुर्याइए पनि चिकित्सकले बिहान करिब साढे ५ बजे मृत घोषणा गरेका हुन्।
दुर्घटनामा परी सशस्त्र प्रहरी जवान दीपककुमार जङ शाह घाइते भएका छन्। उनको अवस्था मध्यम रहेको र थप उपचारका लागि नेपालगञ्ज मेडिकल कलेज, कोहलपुर पठाइएको प्रहरीले जनाएको छ।
प्रहरीका अनुसार उनीहरू अवैध रूपमा भारततर्फ लैजान लागिएका भैंसी नियन्त्रणमा लिएर भन्सार कार्यालयतर्फ लैजाँदै गर्दा दुर्घटना भएको हो। सोही क्रममा एउटा भैंसीको पनि मृत्यु भएको छ।
ट्रक चालक निरञ्जन दर्जी समेत घाइते भएका छन् । उनको उपचार जिल्ला अस्पताल गुलरियामा भइरहेको छ। ट्रकलाई नियन्त्रणमा लिई घटनाबारे थप अनुसन्धान भइरहेको प्रहरीले जनाएको छ।
प्रतिक्रिया दिनुहोस