बसको ठक्करबाट सल्यानमा एक महिलाको मृत्यु

सल्यान,३१ जेठ । सल्यानमा बसको ठक्करबाट एक महिलाको मृत्यु भएको छ। जिल्लाको शारदा नगरपालिका–१ श्रीनगरस्थित राप्ती राजमार्गमा बसको ठक्करबाट एक महिलाको मृत्यु भएको हो।

आइतबार दिउँसो करिब १२ बजे दाङबाट कुमाखतर्फ जाँदै गरेको ना ३ ख ६६१६ नम्बरको बसले छत्रेश्वरी गाउँपालिका–७ की ४६ वर्षीया उमा रेउलेलाई ठक्कर दिएको प्रहरीले जनाएको छ।

दुर्घटनामा गम्भीर घाइते भएकी रेउलेको टाउको र दुवै खुट्टामा चोट लागेको थियो। उनलाई उपचारका लागि जिल्ला अस्पताल सल्यान लगिएको भए पनि चिकित्सकले मृत घोषणा गरेका हुन्।

प्रहरीका अनुसार बस चालक कुमाख गाउँपालिका–३ निवासी करिब ३० वर्षीय डिल्ली बुढा हुन्। चालक र बसलाई नियन्त्रणमा लिई घटनाबारे थप अनुसन्धान भइरहेको छ।