८ राउन्ड गोली चलाएर लागुऔषध कारोबारी पक्राउः दुई घाइते

काठमाडौ। प्रहरीले मोरङको रतुवामाईमा लागुऔषध कारोबारीलाई नियन्त्रणमा लिन आठ राउन्ड गोली चलाएको छ। प्रहरीको गोली लागेर दुई जना घाइते भएका छन् भने तीन जना पक्राउ परेका छन्।

नेपाल-भारत सीमावर्ती क्षेत्र नजिकै भएको घटनामा प्रहरीले पेस्तोल, करिब आधा किलो खैरो हेरोइन र मोटरसाइकलसमेत बरामद गरेको छ।

मोरङ प्रहरीका प्रवक्ता एवं सूचना अधिकारी डीएसपी मकेन्द्रकुमार मिश्रका अनुसार गोली लागेर भारतको अररिया, कुशाहाका २२ वर्षीय दीपककुमार बोसाक र कुटुमगन्जका ४० वर्षीय पुरन बोसाक घाइते भएका छन्। दुवैको घुँडामुनि गोली लागेको र उनीहरूको कोशी अस्पताल विराटनगरमा उपचार भइरहेको छ।

उनीहरूसँगै रहेका मोरङको रतुवामाई नगरपालिका-१ चुनिमारीका ३५ वर्षीय प्रमोद ठाकुर पनि पक्राउ परेका छन्।

लागुऔषध ओसारपसार भइरहेको विशेष सूचनाका आधारमा लागुऔषध नियन्त्रण ब्युरोको प्रहरी टोली खटिएको थियो। राति करिब ९ः३० बजे रतुवामाई नगरपालिका-६ शनिश्चरेमा भारतीय नम्बर प्लेट बीआर ३७ भी ३९२६ र नम्बर नखुलेको अर्को मोटरसाइकलमा सवार तीन जनालाई प्रहरीले रोक्न खोजेको थियो। तर, उनीहरू भाग्न खोजेपछि प्रहरीले गोली चलाएको थियो।

डीएसपी मिश्रका अनुसार प्रहरीले चाइनिज पेस्तोलबाट पाँच र ब्रेडा पेस्तोलबाट तीन गरी आठ राउन्ड गोली प्रहार गरेको थियो।

पक्राउ परेकाहरूको साथबाट एक थान घरेलु पेस्तोल र त्यसमा लाग्ने एक राउन्ड गोली बरामद भएको प्रहरीले जनाएको छ। त्यस्तै, करिब ५०० ग्राम खैरो हेरोइन र मोटरसाइकलसमेत बरामद गरिएको छ।

प्रहरीका अनुसार पक्राउ परेका व्यक्तिहरू लामो समयदेखि लागुऔषध कारोबारमा संलग्न रहँदै आएका थिए। घटनाबारे थप अनुसन्धान भइरहेको डीएसपी मिश्रले जानकारी दिएका छन्।