तुलसीपुरमा ब्राउन सुगरसहित एक युवक पक्राउ

दाङ,२३ माघ। प्रहरीले तुलसीपुरबाट लागू औषध ब्राउन सुगर सहित एक युवकलाई पक्राउ गरेको छ। तुलसीपुर उपमहानगरपालिका–६ खैराबाङ मन्दिरतर्फ जाने भित्री सडकखण्डबाट लागूऔषध ब्राउन सुगरसहित एक युवक पक्राउ परेका हुन् ।

माघ १२ गते दिउँसो ३ बजे शंकास्पद रूपमा हिँडिरहेका तुलसीपुर उपमहानगरपालिका वडा नम्बर ६ निवासी २१ वर्षीय सन्तोष बिकलाई प्रहरीले चेक जाँच गरेको थियो। चेकजाँचका क्रममा बिकको साथबाट

लागूऔषध फेला परेको हो। उनको साथमा कालो प्लास्टिकमा तीन वटा पुरिया र सिल्भर रंगको पेपरमा राखिएको एउटा पुरिया बरामद गरिएको प्रहरीले जनाएको छ। परीक्षण गर्दा उक्त पदार्थ ब्राउन सुगर जस्तो देखिएको र कुल १ सय २० मिलिग्राम तौल रहेको इलाका प्रहरी कार्यालय तुलसीपुरले जनाएको छ।

यसबाहेक, विकको साथबाट साम्सुङ ग्यालेक्सी मोडेल र आइफोन XS Max मोडेलका दुई मोबाइल फोन समेत बरामद गरिएको प्रहरीले बताएको छ।

जिल्ला अदालत घोराहीबाट म्याद थप अनुमति लिएर उनलाई अनुसन्धानका लागि प्रहरी हिरासतमा राखिएको छ।