बाँके,११ फागुन । बाँकेको राप्तिसोनारी गाउँपालिका–३ बैसास्थित हरियाली सामुदायिक वनको कम्दी करिडोरमा ९५ वटा क्यामेरा जडान गरिएको छ। यो जडान वन्यजन्तु गतिविधि अनुगमन, बासस्थान अध्ययन, तथा जैव विविधताको संरक्षण गर्ने उद्देश्यले गरिएको डिभिजन वन कार्यालय बाँकीले जनाएको छ।
डिभिजन वन कार्यालय, बाँकेका डिभिजनल वन अधिकृत शङ्करप्रसाद गुप्ताका अनुसार, यी क्यामेराले वन्यजन्तुको आहोरदोहोर ट्र्याक गर्न मद्दत पुर्याउनेछ र मानव–वन्यजन्तु द्वन्द्व न्यूनीकरणमा योगदान दिनेछ।
उनले थप जानकारी दिँदै भने कि डिभिजन वन कार्यालय अन्तर्गतका सबडिभिजन वन कार्यालयहरू जिल्लामा दिगो वन व्यवस्थापन सुनिश्चित गर्न सक्रिय रूपमा संलग्न छन्। राष्ट्रिय वन व्यवस्थापन कार्यक्रम अन्तर्गत सामुदायिक वनबाट काठ तथा दाउरा संकलन गर्ने कार्य गत कात्तिकदेखि सञ्चालनमा छ।
साथै, वन कार्यालयका अनुसार, सामुदायिक वन समूह, पदाधिकारी, तथा उपभोक्ताहरूलाई वन व्यवस्थापन, सुशासन, तथा संस्था सञ्चालन प्रक्रियाका सम्बन्धमा जानकारी गराउन विभिन्न अन्तर्क्रिया तथा छलफल कार्यक्रमहरू सञ्चालन गरिएको छ।
© 2024 Pradesh Kura. All rights reserved.
Powered By : Clock b Business Technology
प्रतिक्रिया दिनुहोस