काठमाडौं, २० फागुन – काठमाडौंको थापाथली चोक नजिक मेलम्ची खानेपानी आयोजनाको पाइप फुट्दा सडक अवरुद्ध भएको छ। बिहानै पाइप फुटेपछि सडक जलमग्न बनेको छ भने त्यस क्षेत्र केही समयसम्म डुबानमा परेको थियो।
प्राप्त जानकारीअनुसार थापाथली चोकबाट नर्भीक इन्टरनेशनल अस्पतालतर्फ जाने सडक खण्डमा पाइप फुटेको हो। यसले गर्दा आवागमन प्रभावित भएको छ। तर, पाइप फुट्नुको कारण अहिलेसम्म खुल्न सकेको छैन।
यसअघि पनि काठमाडौंको बबरमहल क्षेत्रमा मेलम्चीको मुख्य पाइप फुट्दा बाढी आएर सरकारी कार्यालयहरू डुबानमा परेका थिए। विद्युत प्राधिकरणको काम गर्ने क्रममा त्यहाँ पाइप फुटेको थियो।
प्रतिक्रिया दिनुहोस