देशभर ७ हजार बढी विपद्का घटनाः ४७९ जनाको मृत्यु

दाङ,१२चैत । गत वैशाख १ गतेदेखि हालसम्म देशभर सात हजार २३१ वटा विपद्का घटना भएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार ती घटनाबाट १३ हजार ९८ परिवार प्रभावित भएका छन् भने ४७९ जनाको मृत्यु भएको छ।

यस अवधिमा १ हजार ८०० जना घाइते भएका छन्। प्राधिकरणका अनुसार सबैभन्दा धेरै ३ हजार ४८० वटा आगलागीका घटना भएका छन्। यसैगरी बाढीका ३२१, पहिरोका ६०४, भारी वर्षाका ४४२, चट्याङका ४०६ र सर्पदंशका ६०० घटना भएका छन्।

यस्तै वन डढेलोका २७९, हुरीबतासका ४५१, जनावर आक्रमणका ५०४, लेक लागेका १२३ र हिउँपहिरोका पाँचवटा घटना भएका छन्। यस अवधिमा भूकम्पका सात, असिना र डुङ्गा पल्टिएका दुई/दुई तथा असिनासहित हुरी र शीतलहरका एकरएक घटना भएका प्राधिकरणले जनाएको छ।

प्राधिकरणका अनुसार चैत १० गते बिहानदेखि ११ गते बिहानसम्म मात्र २६ वटा विपद्का घटना भएका छन्। एकै दिन नौ जिल्लाका १३ स्थानमा आगलागी हुँदा १० जना घाइते भएका छन्।