देउवा समूहसँग सहमतिका लागि गगन थापाका तीन प्रस्ताव

काठमाडौ,३१ वैशाख। गगन थापा ले शेरबहादुर देउवा समूहसँग पार्टीभित्र सहमति कायम गर्न तीन प्रस्ताव अघि सारेका छन्।

पोखरामा आयोजित प्रदेशस्तरीय भेलालाई सम्बोधन गर्दै थापाले पार्टीभित्र विचार समूहका भेला र छलफलप्रति आफूलाई कुनै आपत्ति नभएको स्पष्ट पारे। उनले १४औँ महाधिवेशनबाट निर्वाचित भई हाल केन्द्रीय समितिभन्दा बाहिर रहेका नेताहरूलाई पुनः सक्रिय भूमिकामा आउन आग्रह गरे।

थापाले पार्टी एकता मजबुत बनाउन सदस्यता समिति, निर्वाचन समिति र अनुशासन समिति मा सबै पक्षको सहभागिता सुनिश्चित गर्न प्रस्ताव अघि सारेका हुन्। सबैलाई स्वीकार्य हुने गरी समिति गठन गर्न आफू तयार रहेको उनले बताए।

उनले पार्टीभित्र भेला र छलफल स्वाभाविक प्रक्रिया भएको उल्लेख गर्दै यसमा कसैलाई रोक्न नहुने धारणा व्यक्त गरे। साथै, आन्तरिक बहसभन्दा बाहिर निस्केर जनतासँग पुनः संवाद गर्नुपर्ने आवश्यकता औँल्याए।
करिब १० लाख मतदाता पार्टीसँग असन्तुष्ट रहेको उल्लेख गर्दै थापाले उनीहरूको विश्वास पुनः जित्नुपर्ने बताए।

यसैबीच, उनले क्रियाशील सदस्यता अद्यावधिक अभियानलाई प्राथमिकतामा राख्न आग्रह गर्दै वडा सभापतिहरूलाई काम नगरे जिम्मेवारी खोसिन सक्ने चेतावनी समेत दिए।