स्रोत नखुलेको १० लाख रुपैयाँसहित भारतीय नागरिक पक्राउ

सिरहा, १० साउन १। सिरहाको लहान–३ अस्पताल चोक नजिक शनिबार बिहान सशस्त्र प्रहरीले स्रोत नखुलेको ठूलो परिमाणको नगदसहित एक भारतीय नागरिकलाई पक्राउ गरेको छ।

पक्राउ पर्नेमा भारतको मधुवनी जिल्लास्थित लौकाहा बजार बसोबास गर्ने अन्दाजी २४ वर्षीय राहुल कुमार रहेका छन्। उनलाई सशस्त्र प्रहरी बल नेपाल नम्बर ७ गण सिरहाबाट खटिएको चेक प्वाइन्ट टोलीले बिहान नियन्त्रणमा लिएको हो।

सशस्त्र प्रहरी उपरीक्षक नरेश भण्डारीका अनुसार इनरुवाबाट लहानतर्फ आउँदै गरेको यात्रुवाहक बसमा सवार कुमारलाई चेकजाँचको क्रममा १० लाख एक हजार ६९५ रुपैयाँसहित पक्राउ गरिएको हो। उक्त नगद रकमको कुनै वैध स्रोत खुलाउन नसकेकोले उनलाई नियन्त्रणमा लिइएको जनाइएको छ।