तुलसीपुरमा जुवा खेल्दै गरेका सात जना पक्राउ

दाङ,३१ असोज । प्रहरीले दाङको तुलसीपुरबाट जुवा तास खेल्दै गरेका ७ जनालाई पक्राउ गरेको छ।

बिहीबार राति ११:४५ बजे तुलसीपुर उपमहानगरपालिका–३ दमारगाउँमा जुवातास खेलिरहेको अवस्थामा उनीहरूलाई पक्राउ गरेको हो।

स्थानीय कुबेर रेउलेको घरमा अवैध रूपमा जुवा तास खेलिरहेको भन्ने गोप्य सूचनाका आधारमा इलाका प्रहरी कार्यालय तुलसीपुरबाट प्रहरी निरीक्षक प्रकाश भण्डारीको कमाण्डमा खटिएको टोलीले छापा मारेको थियो।

खानतलासीका क्रममा उक्त घरबाट तास ५२ पत्ता (१ गड्डी) र नगद रु ६६ हजार ५ सय ६० रुपैयाँ बरामद गरिएको प्रहरीले जनाएको छ।

प्रहरीले तुलसीपुर–३ दमारगाउँका ५८ वर्षीय कुबेर रेउले, ३२ वर्षीय डम्मरराज वली, २८ वर्षीय सन्दीप सुनार, २४ वर्षीय मनिष चन्द, ३२ वर्षीय टिकाराम केसी, ३२ वर्षीय अरुणकुमार चन्द र ३६ वर्षीय अजय गिरीलाई नियन्त्रणमा लिइएको हो।

पक्राउ परेका सबैलाई इलाका प्रहरी कार्यालय तुलसीपुरमा राखी थप अनुसन्धान भइरहेको प्रहरीले जनाएको छ।