वैदेशिक रोजगारीको नाममा ठगी गर्ने ५ जना पक्राउ

काठमाडौ,२६ साउन। वैदेशिक रोजगारीका लागि आकर्षक तलबको प्रलोभन देखाउँदै विभिन्न देश पठाइदिने भन्दै रकम ठगी गरेको आरोपमा प्रहरीले पाँच जनालाई पक्राउ गरेको छ।

पक्राउ पर्नेमा कञ्चनपुरको भीमदत्त नगरपालिका८ घर भई काठमाडौं महानगरपालिका-८ बस्ने ३० वर्षीय करण ऐर, बुढानिलकण्ठ नगरपालिका-१३ घर भई काठमाडौं महानगरपालिका–१२ बस्ने ३० वर्षीया सुनिता श्रेष्ठ, मोरङको बेलबारी नगरपालिका-२ घर भई भक्तपुरको मध्यपुर थिमी नगरपालिका-५ बस्ने ३६ वर्षीय प्रेम पुरी, काभ्रेपलाञ्चोकको मण्डनदेउपुर नगरपालिका-६ घर भई काठमाडौंको गोकर्णेश्वर नगरपालिका-७ बस्ने ४२ वर्षीय अच्युत दुलाल र कालिकोटको खाँडाचक्र नगरपालिका-२ घर भई काठमाडौं महानगरपालिका-२८ बस्ने ३५ वर्षीय बिर्खबहादुर विक रहेका छन्।

प्रहरीका अनुसार करणले क्रोएसिया पठाइदिने भन्दै एक जना पीडितबाट ६ लाख रुपैयाँ, सुनिताले युरोप पठाइदिने भन्दै एक जनाबाट ३ लाख ५० हजार रुपैयाँ, प्रेमले जापान पठाइदिने भन्दै ११४ जना पीडितबाट २ करोड २५ लाख रुपैयाँ, अच्युतले क्यानडा पठाइदिने भन्दै एक जनाबाट ३७ लाख रुपैयाँ र बिर्खबहादुरले क्रोएसिया पठाइदिने भन्दै एक जनाबाट १ लाख रुपैयाँ लिएका थिए।

रकम लिएपछि उनीहरू सम्पर्कविहीन भएको भन्दै पीडितहरूले प्रहरीमा उजुरी दिएका थिए। उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको टोलीले करण र सुनितालाई काठमाडौं महानगरपालिका-१२ बाट सोमबार, अच्युतलाई गोकर्णेश्वर नगरपालिका-७ बाट आइतबार, बिर्खबहादुरलाई काठमाडौं महानगरपालिका-१६ बाट शनिबार र प्रेमलाई काठमाडौं महानगरपालिका-३ बाट शुक्रबार पक्राउ गरेको हो। पक्राउ परेका पाँचै जनालाई आवश्यक अनुसन्धान तथा कारबाहीका लागि वैदेशिक रोजगार विभाग पठाइएको प्रहरीले जनाएको छ।