उत्तरकाशीमा भीषण वर्षा र बाढी : ४ जनाको मृत्यु, ५० जना बेपत्ता

काठमाडौं,२० साउन। भारतको उत्तराखण्ड राज्यअन्तर्गत उत्तरकाशीको हर्षिल क्षेत्रमा आरीघोप्टे (क्लाउडबर्स्ट) वर्षापछि आएको भीषण बाढीका कारण कम्तीमा ४ जनाको मृत्यु भएको छ भने ५० जना बेपत्ता भएका छन्।

उत्तरकाशीका जिल्ला अधिकारी (डीएम) प्रशान्त आर्यका अनुसार लेदो र पानीको भेलले स्थानीय भौतिक संरचनाहरूमा ठूलो क्षति पुर्‍याएको छ। बाढीपछि गंगोत्री धाम जाने सबै सडक सम्पर्क विच्छेद भएको छ।

बाढी धराली गाउँमा आएको हो, जुन हर्षिलस्थित भारतीय सेनाको शिविरबाट करिब ४ किलोमिटर टाढा पर्छ। खीर गढ नालीमा आएको भेलले होटल, बजारलगायतका संरचनाहरू पूर्ण रूपमा क्षतिग्रस्त बनाएको प्रत्यक्षदर्शीहरूले बताएका छन्।

एक प्रत्यक्षदर्शीले सञ्चारमाध्यमलाई भनेका छन्, “होटलदेखि बजारसम्म सबै कुरा नष्ट भएको छ, मैले पहिले कहिल्यै यस्तो विपत्ति देखेको थिइनँ।”

घटनाप्रति उत्तराखण्डका मुख्यमन्त्री पुष्कर सिंह धामीले दुःख व्यक्त गर्दै सामाजिक सञ्जालमार्फत जानकारी दिएका छन् कि उनी उच्च अधिकारीहरूसँग निरन्तर सम्पर्कमा छन् र परिस्थितिको नजिकबाट निगरानी गरिरहेका छन्।

घटनापछि प्रहरी, एसडीआरएफ, एनडीआरएफ, सेना र अन्य उद्धार टोलीहरू बाढी प्रभावित क्षेत्रमा खटिइसकेका छन्। भारतीय सेनाले हालसम्म कम्तीमा १५ जनाको उद्धार गरिसकेको जनाएको छ।