रुसको ड्रोन आक्रमणबाट १२ जना मजदुरले मृत्यु

काठमाडौं,१९ माघ । युक्रेनको निप्रो सहरमा खानी मजदुर बोकेको बसलाई लक्षित गरी रुसले गरेको ड्रोन आक्रमणमा कम्तीमा १२ जनाको मृत्यु भएको छ।
युक्रेनी आपत्कालीन सेवाका अनुसार आइतबार भएको आक्रमणमा अन्य सात जना घाइते भएका छन्। आक्रमणपछि बसमा लागेको आगोलाई सुरक्षाकर्मीले नियन्त्रणमा लिएका थिए।

युक्रेनको सबैभन्दा ठूलो निजी ऊर्जा कम्पनी डीटीईकेले उक्त बस आफ्नो भएको पुष्टि गर्दै निप्रोपेत्रोभ्स्क क्षेत्रमा रहेका आफ्ना खानीहरूमा रुसले ‘ठूलो परिमाणमा आतंकवादी हमला’ गरेको आरोप लगाएको छ। निप्रो उक्त क्षेत्रको राजधानी हो।

डीटीईकेले टेलिग्राममार्फत जारी गरेको वक्तव्यमा भनिएको छ, “आक्रमणको मुख्य निशाना कम्पनीको त्यो बस थियो, जसले निप्रोपेत्रोभ्स्क क्षेत्रमा आफ्नो सिफ्ट पूरा गरी खानी मजदुरहरूलाई कार्यस्थलबाट घर फर्काउँदै थियो।”

आगामी बुधबार र बिहीबार रुस–युक्रेनबीच युद्धविरामका लागि अर्को चरणको वार्ता हुन लागेको समयमा भएको यो आक्रमणलाई युक्रेनमाथि दबाब बढाउने रुसी रणनीतिका रूपमा हेरिएको छ।
यसैबीच, युक्रेनी राष्ट्रपति भोलोदिमिर जेलेन्स्कीले फेब्रुअरी ४ र ५ (बुधबार र बिहीबार) अबु धाबीमा रुस र युक्रेनका प्रतिनिधिबीच त्रिपक्षीय वार्ता हुने पुष्टि गरेका छन्। टेलिग्राममा सन्देश जारी गर्दै उनले भने, “हाम्रो वार्ता टोलीबाट रिपोर्ट प्राप्त भएको छ।

अबु धाबीमा अर्को बैठकको मिति तय गरिएको छ। युक्रेन ठोस वार्ताका लागि तयार छ र युद्धलाई सम्मानजनक तरिकाले अन्त्य गर्ने परिणाम चाहन्छ।”
उक्त वार्तामा अमेरिकाको पनि सहभागिता रहने अपेक्षा गरिएको छ। तर, यसबारे अमेरिकी वा रुसी अधिकारीहरूबाट तत्काल औपचारिक प्रतिक्रिया आएको छैन।

रुसका शीर्ष प्रतिनिधि किरिल दिमित्रिएभले शनिबार फ्लोरिडामा अमेरिकी प्रतिनिधिमण्डलसँग भएको भेट ‘सकारात्मक’ रहेको बताएका छन्। अबु धाबीमा हुने वार्तालाई युद्ध अन्त्य गर्ने प्रयासको निरन्तरताका रूपमा हेरिएको छ। यद्यपि, पूर्वी औद्योगिक क्षेत्र डोनबाससहित रुसले कब्जा गरेका भूभागबाट सेना फिर्ता गर्ने विषयमा दुवै पक्षबीच अझै गम्भीर मतभेद कायमै छन्।

यो आक्रमण त्यस्तो समयमा भएको हो, जब हालै अमेरिकी राष्ट्रपति डोनाल्ड ट्रम्पले रुस एक साताका लागि आक्रमण रोक्न तयार भएको दाबी गरेका थिए। उनले चिसो मौसमका कारण आफूले रुसी राष्ट्रपति भ्लादिमिर पुटिनलाई आक्रमण रोक्न आग्रह गरेको र त्यसमा सहमति आएको बताएका थिए।

तर, आइतबार बिहान रुसले दक्षिणी युक्रेनको एउटा अस्पतालमा पनि ड्रोन आक्रमण गरेको छ। उक्त आक्रमणमा अस्पतालको स्त्री रोग विभागमा आगलागी हुनुका साथै तीन महिला घाइते भएको युक्रेनी आपत्कालीन सेवाले जनाएको छ।