जलेको अवस्थामा फेला परेकी युवतीको उपचारकै क्रममा मृत्यु

बांके,१५ चैत । आगोले जलेको अवस्थामा भेटिएकी एक युवतीको उपचारका क्रममा मृत्यु भएको छ। जिल्ला प्रहरी कार्यालय बाँकेका सूचना अधिकारी तथा प्रहरी नायब उपरीक्षक दीपक पातलीका अनुसार नेपालगन्ज उपमहानगरपालिका–१२ कोरियनपुरस्थित भेरी प्राविधिक शिक्षालय नजिक शनिबार राति करिब १२ बजेतिर अन्दाजी ३० वर्षीया युवती जलेर घाइते अवस्थामा फेला परेकी थिइन्।

घाइते युवतीलाई उपचारका लागि भेरी अस्पताल लगिएको भए पनि उपचारकै क्रममा उनको मृत्यु भएको प्रहरीले जनाएको छ।

हालसम्म मृतकको पहिचान खुल्न सकेको छैन र शव भेरी अस्पतालमै राखिएको छ। घटनाको कारण खुल्न नसकेको भन्दै प्रहरीले अनुसन्धान जारी रहेको जनाएको छ।