दाङमा किशोर हत्या प्रकरणः एक युवतीसहित ३ जना पक्राउ

दाङ,२१ चैत । राप्ती गाउँपालिका–४ गोलिनालामा एक किशोरको हत्या प्रकरणमा संलग्न एक युवतीसहित तीन जनालाई प्रहरीले पक्राउ गरेको छ।

इलाका प्रहरी कार्यालय भालुवाङका प्रमुख प्रहरी निरीक्षक पुष्करसिंह ऐरीको नेतृत्वमा खटिएको टोलीले घटना भएको २४ घण्टा नबित्दै उनीहरूलाई पक्राउ गरेको हो।

पक्राउ पर्नेमा बंगलाचुली गाउँपालिकाका २० वर्षीय सन्दिप वली, राप्ती गाउँपालिकाका १८ वर्षीय निश्चल चौधरी र १८ वर्षीया आकृति बुढा रहेका छन्। जिल्ला प्रहरी कार्यालय दाङका निमित्त प्रवक्ता प्रहरी निरीक्षक बाबुराम बस्नेतले उनीहरूलाई प्रमाणसहित नियन्त्रणमा लिइएको जानकारी दिएका छन्।

प्रहरीका अनुसार बिहीबार राति राप्ती गाउँपालिका–२ बराखुट्टीका १६ वर्षीय स्मित प्रधानको हत्या गरी शव वडा नं। ४ गोपीनालास्थित दोलई खोलानजिकको नालामा फालिएको अवस्थामा फेला परेको थियो।

घटनाबारे जानकारी पाएलगत्तै प्रहरी टोली घटनास्थल पुगेर अनुसन्धान थालेको थियो। प्रारम्भिक अनुसन्धानअनुसार धारिलो हतियार प्रयोग गरी हत्या गरिएको आशंका गरिएको छ।

यस घटनामा एक किशोर घाइते अवस्थामा भेटिएका थिए। घटनाबारे थप अनुसन्धान भइरहेको प्रहरीले जनाएको छ।