उपसभामुखमा रुबी ठाकुर निर्वाचित

काठमाडौ,२७ चैत । रुबी कुमारी ठाकुर प्रतिनिधिसभाको उपसभामुखमा निर्वाचित भएकी छन्। उपसभामुखका लागि प्रस्तुत प्रस्तावमा पक्षमा २२९ मत र विपक्षमा ५ मत परेको थियो। मतदानमा २५६ जना सांसद सहभागी भएका थिए।

ठाकुरलाई राष्ट्रिय स्वतन्त्र पार्टी, नेपाली कांग्रेस र नेकपाको समर्थन रहेको थियो भने नेपाल कम्युनिष्ट पार्टी (एमाले) तटस्थ रहेको थियो।

सभामुख डोलप्रसाद अर्याल ले मतपरिणाम घोषणा गर्दै ठाकुर अत्यधिक बहुमतसहित निर्वाचित भएको जानकारी गराएका हुन्।

ठाकुरका बुवा सोगराथ ठाकुर हाल वैदेशिक रोजगारीका क्रममा साउदी अरेबिया मा रहेका छन् भने आमा रेणु ठाकुर गृहिणी तथा किसान हुन्।

२५ वर्षीया ठाकुरले धनुषाबाट एसइई उत्तीर्ण गरी बलरा पोलिटेक्निकबाट सिभिल इन्जिनियरिङमा डिप्लोमा अध्ययन पूरा गरेकी छन्।

जेनजी आन्दोलनपछि उनी श्रम संस्कृति पार्टीमा आवद्ध भएकी हुन्। हाल उनी सोही पार्टीबाट समानुपातिक सांसद हुन्।