खरको थुप्रोमा खेल्दा काठले लागेर बालकको मृत्यु

रोल्पा,४ वैशाख। खरको थुप्रोमा खेल्ने क्रममा काठले लागेर एक ५ वर्षीय बालकको मृत्यु भएको छ। त्रिवेणी गाउँपालिका–६ सानो भुर्तीका बालाराम ओलीका छोरा शङ्कर ओलीको बिहीबार राति मृत्यु भएको हो।

नेपाल प्रहरीका अनुसार दिउँसो करिब ३ बजे घरआँगनमा थुपारिएको खरको थुप्रोमा खेल्ने क्रममा भित्र लुकेको काठको ठुटोमा ठोक्किँदा बालकको पेटमा गम्भीर चोट लागेको थियो।

घाइते बालकलाई राति करिब पौने ९ बजे नेर्पा स्वास्थ्य चौकी, जुगार लगिएको थियो। तर उपचारका क्रममा उनलाई मृत घोषणा गरिएको प्रहरीले जनाएको छ।