विद्यार्थीलाई ४५ प्रतिशत भाडा छुट दिन निर्देशन

दाङ,९ वैशाख। यातायात व्यवस्था विभागले सार्वजनिक यातायातमा विद्यार्थीलाई ४५ प्रतिशत भाडा छुट दिन निर्देशन दिएको छ। पछिल्लो समय भाडा वृद्धि भए पनि विद्यार्थीहरूले तोकिएको छुट नपाएको गुनासो बढेपछि विभागले यातायात व्यवसायीलाई उक्त छुटलाई निरन्तरता दिन निर्देशन दिएको हो।

विभागका अनुसार हेलो सरकार र गुनासो पेटिकामा विद्यार्थीहरूले ४५ प्रतिशत छुट नपाएको गुनासो दर्ता भएपछि ध्यानाकर्षण भएको हो।निर्देशन अवज्ञा गरी छुट नदिएको पाइएमा सम्बन्धित व्यवसायीमाथि कारबाही गरिने विभागले चेतावनी दिएको छ।

सार्वजनिक यातायातमा विद्यार्थीलाई ४५ प्रतिशत छुट दिने व्यवस्था २०६५ फागुन २० गते सरकार र यातायात व्यवसायीबीच भएको सहमतिअनुसार लागू हुँदै आएको छ।