कांग्रेसमा संसदीय दलको नेता चयन प्रक्रिया सुरु

काठमाडौ,१० वैशाख । प्रमुख प्रतिपक्षी दल नेपाली कांग्रेसमा संसदीय दलको नेता चयन प्रक्रिया सुरु भएको छ। पार्टीका तर्फबाट दलको नेता चयनका लागि निर्वाचन समिति गठन गरिएको छ। सहमहामन्त्री प्रकाश रसाइली स्नेहीको नेतृत्वमा बनेको समितिले निर्वाचन प्रक्रिया अघि बढाएको हो।

समितिले यसअघि सार्वजनिक गरेको कार्यतालिकाअनुसार ११ गतेभित्र दलको नेता चयन प्रक्रिया टुंग्याइने जनाएको थियो। सोहीअनुसार मतदाता नामावली पनि सार्वजनिक गरिएको छ।

दलको नेता चयनका लागि भोलि शुक्रबार उम्मेदवारी दर्ता गरिनेछ भने सोही दिन दिउँसो ४ बजेदेखि मतदान हुने कार्यतालिका तय गरिएको छ।