दाङमा अतिक्रमण हटाउन प्रशासनको पहल सुरु

दाङ,१५ वैशाख । जिल्ला प्रशासन कार्यालय दाङले सरकारी तथा सार्वजनिक जग्गा अतिक्रमण हटाउने विषयमा जिल्लाका १० वटै स्थानीय तहका प्रमुख र उपप्रमुखलाई छलफलका लागि बोलाएको छ।

संघीय सरकारको शासकीय सुधारअन्तर्गत सार्वजनिक गरिएको १०० बुँदे कार्यसूचीअनुसार अतिक्रमण नियन्त्रणमा कडाइ गर्न प्रशासनले पहल थालेको हो।

प्रमुख जिल्ला अधिकारी विश्वप्रकाश अर्यालका अनुसार सो कार्यसूचीको बुँदा नम्बर ९२ अनुसार नयाँ अतिक्रमण रोक्ने र बनाइएका संरचना हटाउने कार्य तत्काल सुरु गर्ने लक्ष्य राखिएको छ।

यसैका आधारमा प्रशासनले पालिकाहरूलाई परिपत्र गर्दै आज बिहान सवा १० बजे स्वास्थ्य कार्यालयको सभाहलमा छलफल आयोजना गरेको जनाएको छ।