वडासचिवलाई धम्की दिने ‘जेनजी अभियन्ता’ पक्राउ

काठमाडौ,२ जेठ। आफूलाई ‘जेनजी अभियन्ता’ भन्दै दैलेखका एक वडासचिवलाई धम्की दिने युवक पक्राउ परेका छन् । जिल्ला प्रहरी परिसर काठमाडौले दैलेखको दुल्लु नगरपालिका–१३ का वडासचिव कमल भण्डारीलाई फोनमार्फत धम्की दिएको आरोपमा प्रकाश खड्कालाई पक्राउ गरेको हो ।

काठमाडौ प्रहरी परिसरका प्रमुख रमेश थापाका अनुसार खड्काले आफूलाई प्रधानमन्त्री कार्यालयसँग सम्बन्धित व्यक्ति भन्दै वडासचिव भण्डारीलाई एक सिफारिसका विषयमा दबाब दिँदै धम्की दिएका थिए ।

प्रहरीले पक्राउ परेका खड्कामाथि थप अनुसन्धान भइरहेको जनाएको छ । खड्काको धम्कीपूर्ण फोन संवाद सामाजिक सञ्जालमा भाइरल बनेपछि विभिन्न प्रतिक्रिया आएका छन् । सामाजिक सञ्जाल प्रयोगकर्ताले उनले विभिन्न कार्यालयका कर्मचारी तथा हाकिमलाई बजेट र आर्थिक विषयमा दबाब दिने, विमान टिकट काट्न लगाउने जस्ता काम गर्ने गरेको आरोप लगाएका छन् । केहीले उनलाई सुधन गुरुङ निकट रहेको दाबी पनि गरेका छन् ।

यस घटनाप्रति प्रधानमन्त्री तथा मन्त्रिपरिषद्को कार्यालयले ध्यानाकर्षण भएको जनाएको छ । कार्यालयका सहसचिव तथा प्रवक्ता हेमराज अर्यालले विज्ञप्ति जारी गर्दै कानुनअनुसार जिम्मेवारी निर्वाह गरिरहेका राष्ट्रसेवक कर्मचारीलाई भय र त्रास सिर्जना गर्ने तथा धम्क्याउने कार्य निन्दनीय र अक्षम्य भएको बताएका छन् ।

कार्यालयले सुशासनको अभियानमा कुनै सम्झौता नहुने उल्लेख गर्दै खड्कामाथि आवश्यक कानुनी कारबाही प्रक्रिया अघि बढाउन प्रहरी प्रशासनलाई निर्देशन दिएको जनाएको छ ।