केन्याको बोर्डिङ स्कुलमा आगलागी:१६ विद्यार्थीको मृत्यु

काठमाडौ,१४ जेठ । केन्याको गिलगिलस्थित एक बोर्डिङ स्कुलमा आगलागी हुँदा १६ जना विद्यार्थीको ज्यान गएको छ भने ७४ जना घाइते भएका छन्। प्रहरीका अनुसार बिहीबार बिहान उतुमिसी गर्ल्स स्कुलको होस्टलमा विद्यार्थीहरू सुतिरहेको बेला आगलागी भएको हो।

घाइते सबै विद्यार्थीको अस्पतालमा उपचार भइरहेको जनाइएको छ। केन्या रेडक्रस र प्रहरी टोलीले घटनास्थलमा पुगेर उद्धार तथा राहत कार्य जारी राखेका छन्। आगलागीको कारण भने अहिलेसम्म खुल्न सकेको छैन।

प्रहरी कमाण्डर मसुद म्विनीले घटनालाई अत्यन्त दुःखद भन्दै पीडित परिवारप्रति समवेदना व्यक्त गरेका छन्।

केन्यामा पछिल्ला वर्षहरूमा विद्यालयमा यस्ता दुर्घटना दोहोरिँदै आएका छन्। होस्टलमा धेरै विद्यार्थीको चाप र सुरक्षा मापदण्डको कमीलाई यस्ता घटनाको मुख्य कारण मानिँदै आएको छ।