घाँस काट्ने क्रममा लडेर २१ वर्षीय युवतीको मृत्यु

प्युठान,३१ जेठ । प्यूठानमा घाँस काट्ने क्रममा भीरबाट लडेर एक युवतीको मृत्यु भएको छ। नौबहिनी गाउँपालिका–५ गावै माझटोलकी २१ वर्षीया दुर्गा गिरीको आइतबार बिहान अँधेरीखोला नजिकै भीरबाट लडेर मृत्यु भएको प्रहरीले जनाएको छ।

प्रहरीका अनुसार बिहान करिब ८ बजे घाँस काट्दै गर्दा उनी लडेकी थिइन्। घटनाबारे स्थानीयले करिब १० बजे सूचना दिएपछि प्रहरी टोली घटनास्थल पुगेको थियो।

मृतकका श्रीमान् गोविन्द गिरी रोजगारीका लागि विदेशमा छन्। उनका तीन वर्षका एक छोरा छन्।
शव पोस्टमार्टमका लागि जिल्ला अस्पताल पठाइएको प्रहरीले जनाएको छ।