सातै प्रदेशमा ब्लु बस सन्चालन गर्ने सरकारको तयारी

काठमाडौ,६ असार । सरकारले सार्वजनिक यातायातमा महिला तथा बालिकाको सुरक्षालाई प्राथमिकता दिँदै ‘ब्लु बस’ सेवा सञ्चालन गर्ने योजना अघि बढाएको छ। कार्ययोजनाअनुसार पहिलो चरणमा १०० दिनभित्र कम्तीमा २५ वटा बस सञ्चालनमा ल्याउने लक्ष्य राखिएको छ।

यसअन्तर्गत काठमाडौं उपत्यकामा साझा यातायातसँगको सहकार्यमा कम्तीमा सात वटा बस ‘ब्लु बस’का रूपमा सञ्चालन गर्ने तयारी गरिएको छ। उपत्यका बाहिर भने सबै प्रदेशका यातायात व्यवसायी संघसँग समन्वय गरी कम्तीमा १८ वटा बस सञ्चालन गर्ने योजना छ।

मन्त्रालयका अनुसार ब्लु बस सेवा सञ्चालनका लागि आवश्यक कार्यविधि, समय तालिका, लागत अनुमान तथा सञ्चालन जिम्मेवारीसम्बन्धी मस्यौदा प्रस्ताव साझा यातायातबाट प्राप्त भइसकेको छ। सो प्रस्तावका आधारमा प्रशासनिक तथा प्राविधिक तयारी अघि बढाइएको जनाइएको छ।

ब्लु बस सेवा विस्तार गर्दै आगामी आर्थिक वर्षमा सातै प्रदेशमा सञ्चालनका लागि आवश्यक बजेट तथा कार्यक्रमसमेत प्रस्ताव गरिएको मन्त्रालयले जनाएको छ।

यो सेवा सञ्चालनमा आएपछि विशेष गरी विद्यार्थी, श्रमिक, कर्मचारी तथा दैनिक रूपमा सार्वजनिक यातायात प्रयोग गर्ने महिलालाई सुरक्षित र सहज यात्रा सुविधा उपलब्ध हुने अपेक्षा गरिएको छ। साथै सार्वजनिक यातायातमा हुने दुर्व्यवहार तथा असुरक्षाको अनुभूति न्यूनीकरणमा सहयोग पुग्ने विश्वास गरिएको छ।

यसैबीच सार्वजनिक यातायातलाई सुरक्षित बनाउन सीसीटीभी र ड्यासक्याम जडानलाई प्राथमिकता दिइएको छ। हालसम्म साझा यातायातका १११, महानगर यातायातका ४६ तथा पाँचपोखरी सुनौलो यातायातका तीन बसमा सीसीटीभी र ड्यासक्याम जडान गरी सञ्चालनमा ल्याइएको छ।

अन्य सवारी साधनमा पनि यस्तो प्रणाली विस्तार गर्ने काम जारी रहेको छ भने ट्राफिक प्रहरीमार्फत अनुगमन गर्ने व्यवस्था मिलाइएको मन्त्रालयले जनाएको छ।

सार्वजनिक सवारीलाई प्रविधिमैत्री, सुरक्षित र यात्रुमैत्री बनाउने मापदण्डसम्बन्धी मस्यौदा तयार गरी स्वीकृतिका लागि मन्त्रालयमा पठाइएको छ।