खाजा खर्च कटाएर साथीको परिवारलाई सहयोग

भिम मरासिनी ,दाङ। साथीका बाबुको असामयिक निधनको खबरले तुलसीपुरका एक समूह विद्यार्थीलाई मात्र होइन, सम्पूर्ण कक्षालाई स्तब्ध बनायो।

तुलसीपुर उपमहानगरपालिका–११ का आदित्य चौधरीका बाबु तुलसीराम चौधरीको दुबै मिर्गौला फेल भएर केही दिन अघि निधन भएपछि चौधरी परिवार गहिरो आर्थिक र मानसिक संकटमा परेको थियो।

कक्षा–१० मा अध्ययनरत आदित्यका सहपाठीहरूका लागि यो केवल दुःखद खबर मात्र थिएन, यो एक जिम्मेवारी पनि बन्यो। साथीको पीडामा मलम लगाउने उद्देश्यले माया ओलीको नेतृत्वमा उनीहरूले सानो सहयोग संकलन अभियान सुरु गरे।

कक्षामा अनुपस्थित भएका दिनहरूको बचत भएको खाजा खर्च, आफैंले ल्याएको खाजाको पैसा र शिक्षकहरूबाट प्राप्त सहयोग समेत समेटेर जम्मा गरिएको रकम रु ३०,०४५ पुग्यो। आज सो रकम विद्यार्थी टोलीले आदित्यको घरमै पुगेर उनकी आमा उर्मिला चौधरीलाई हस्तान्तरण गर्‍यो।

श्रीमानको उपचारमा ठूलो रकम खर्च भइसकेको बताउँदै उर्मिला चौधरीले यस कठिन घडीमा साथ दिएकोमा सबैप्रति आभार व्यक्त गरिन्। उनले यस्तो संकटको बेलामा सबैले एक अर्काको साथ दिन जरुरी रहेको धारणा पनि राखिन्।