दाङ ,१७ पुस । प्रथम तुलसीपुर महोत्सव–२०८२ अन्तर्गत आज नेपाली चलचित्र क्षेत्रका चर्चित अभिनेता पल शाहको विशेष प्रस्तुति रहने भएको छ।
पुस ४ गतेदेखि सञ्चालन हुँदै आएको महोत्सवमा आज पल शाहको आगमनसँगै दर्शकको उल्लेख्य सहभागिता रहने अपेक्षा आयोजकले गरेका छन्। नेपाली चलचित्र क्षेत्रमा लोकप्रिय अभिनेता पल शाह आज साँझ मुख्य आकर्षणका रूपमा मञ्चमा उत्रिने कार्यक्रम तय भएको छ।
महोत्सव अवधिभर सञ्चालन भइरहेका सांस्कृतिक कार्यक्रम, लाइभ कन्सर्ट, लोकदोहोरी, नृत्य तथा मोडलिङ प्रस्तुतिहरूले दर्शकलाई निरन्तर मनोरञ्जन प्रदान गर्दै आएका छन्।
आजको कार्यक्रममा गायिका सम्झना भण्डारी, गायक टंक खड्का र प्रकाश रेग्मी लगायतका कलाकारहरूको पनि प्रस्तुति रहने आयोजकले जनाएको छ।
यस्तै, मोडल नारायणी खत्री र आशा वि.क.को विशेष प्रस्तुति रहनेछ भने कार्यक्रम सञ्चालन दिपु मगर र सात्तराम सेन्चुरीले गर्नेछन्।
नेपाल घरेलु तथा साना उद्योग महासङ्घ तुलसीपुर, दाङको आयोजनामा सञ्चालन भइरहेको महोत्सवमा स्थानीय उत्पादनको प्रवर्द्धन, उद्योग व्यवसायको विकास तथा सांस्कृतिक पहिचानलाई प्राथमिकता दिइएको छ।
महोत्सव पुस १९ गतेसम्म चल्नेछ। महोत्सव स्थल तुलसीपुर–६ घोराही रोडस्थित खुल्ला मैदानमा रहेको छ। आयोजकले आजको कार्यक्रम सफल बनाउन दर्शक तथा शुभेच्छुकलाई आग्रह गरेका छन्।
प्रतिक्रिया दिनुहोस