आगलागीबाट घाइते महिलाको मृत्यु

जाजरकोट,८ वैशाख। आगलागीबाट घाइते भएकी एक महिलाको उपचारका क्रममा मृत्यु भएको छ । जाजरको जिल्लाको नलगाड नगरपालिका–२ छेप्कामा भएको आगलागीमा परेर घाइते भएकी उनको मृत्यु भएको हो। गत चैत २९ गते ग्यास सिलिन्डर लिक भई स्थानीय ठालुप्रसाद जैसीको घरमा आगलागी हुँदा तीन जना घाइते भएका थिए।

घाइतेमध्ये ४२ वर्षीया माया जैसीको कीर्तिपुर जलन अस्पतालमा उपचारका क्रममा मंगलबार बिहान मृत्यु भएको जिल्ला प्रहरी कार्यालय जाजरकोटले जनाएको छ।

आगलागीमा घाइते भएका अन्य दुई जना रुपा जैसी र गणेश गौतमको काठमाडौंमै उपचार भइरहेको छ। उनीहरूलाई नेपाली सेनाको हेलिकप्टरमार्फत उद्धार गरी नेपालगन्ज हुँदै काठमाडौं लगिएको थियो।