इरानी जहाज अमेरिकी युद्धपोतको नियन्त्रणमा

काठमाडौ,१२ वैशाख । अमेरिकी सेन्ट्रल कमाण्डले आफ्नो एक युद्धपोतले इरानी झण्डा बोकेको जहाजलाई इरानी बन्दरगाहतर्फ जानबाट रोकेको जनाएको छ।

कमाण्डले सामाजिक सञ्जाल ‘एक्स’मार्फत जानकारी दिँदै यूएसएस राफेल पेराल्टा नामक गाइडेड मिसाइल डेस्ट्रोयरले शुक्रबार उक्त जहाज रोकेको उल्लेख गरेको छ। जहाज इरानतर्फ जाँदै गर्दा नियन्त्रणमा लिइएको जनाइएको छ।

यसअघि पनि अमेरिकी पक्षले नौसैनिक नाकाबन्दी सुरु भएदेखि हालसम्म ३४ वटा जहाजको मार्ग परिवर्तन गराइसकेको दाबी गरेको छ।

इरान र संयुक्त राज्य अमेरिकाबीच भएको पहिलो चरणको वार्ता निष्कर्षविहीन भएपछि अमेरिकी राष्ट्रपति डोनाल्ड ट्रम्पले इरानी बन्दरगाहमा नाकाबन्दी गर्ने घोषणा गरेका थिए।

यस कदमको इरानले कडा विरोध गर्दै यसलाई युद्धविराम उल्लंघन भएको जनाएको छ। प्रतिक्रिया स्वरूप इरानले रणनीतिक रूपमा महत्वपूर्ण होर्मुज जलसन्धि बन्द गर्ने निर्णय लिएको बताइएको छ।