भारतीय गृहमन्त्री शाहले पशुपतिनाथलाई अर्पण गरे ४० किलो चन्दन

काठमाडौ,७ जेठ। पशुपतिनाथ मन्दि मा श्रीयन्त्र पूजाआराधनाका लागि भारतीय गृहमन्त्री अमित शाहले ४० किलो चन्दन अर्पण गरेका छन्।उक्त चन्दन प्रतिनिधिसभा सदस्य सन्दीप रानाको समन्वयमा पशुपतिनाथका मूल अर्चक गणेश भट्टलाई हस्तान्तरण गरिएको हो। भारतबाट हरेक वर्ष विशेष अवसरमा पशुपतिनाथलाई चन्दन अर्पण गर्ने परम्परा रहेको छ। गत वर्ष गोआका मन्त्रीले ३५ किलो चन्दन अर्पण गरेका थिए।

पशुपतिनाथका मूल अर्चकले प्राप्त गरेको चन्दन पछि गुठी संस्थान अन्तर्गत पशुपति गोश्वारा कार्यालयकी प्रमुख सुशीला शर्मालाई भण्डारणका लागि जिम्मा लगाइएको छ। नेपाल–भारतबीचको धार्मिक तथा सांस्कृतिक सम्बन्धका कारण हरेक वर्ष यस्तो चन्दन अर्पण हुँदै आएको जनाइएको छ।