राष्ट्रपति कार्यालयबाट हात्तीका दाह्रा चोरी: ६ जना पक्राउ

काठमाडौ,२०जेठ । राष्ट्रपति कार्यालय शीतल निवासमा सजाइएका हात्तीका दुई दाह्रा चोरी भएको खुलेको छ।

गत भदौमा भएको जेनजी आन्दोलनका क्रममा राष्ट्रपति कार्यालयमा तोडफोड र आगजनी भएको थियो। त्यही क्रममा भित्तामा सजाइएका दुई थान हात्तीका दाह्रा चोरी भएको प्रहरीले जनाएको छ।

करिब ९ महिनापछि उक्त चोरी घटनामा संलग्न भएको आरोपमा प्रहरीले ६ जनालाई पक्राउ गरेको छ। काठमाडौं उपत्यका अपराध अनुसन्धान कार्यालयको टोलीले मंगलबार राति नयाँ बसपार्क र मनमैजु क्षेत्रमा अपरेशन चलाएर उनीहरूलाई नियन्त्रणमा लिएको हो।

प्रहरीका अनुसार पक्राउ परेकाहरूले दाह्रा काटेर भाग लगाई आ आफ्नो घरमा लुकाएर राखेको पाइएको छ। घटनाबारे थप अनुसन्धान भइरहेको प्रहरीले जनाएको छ।