सीमा विवाद कूटनीतिक माध्यमबाट समाधान गर्न नेपाल प्रतिबद्ध : परराष्ट्रमन्त्री खनाल

काठमाडौ,२४ जेठ । परराष्ट्रमन्त्री शिशिर खनालले कूटनीतिक माध्यमबाट सीमा विवाद समाधान गर्न नेपाल प्रतिबद्ध रहेको बताएका छन् ।

भारत भ्रमणमा रहेका मन्त्री खनालले नयाँ दिल्लीस्थित नेपाली दूतावासमा आयोजित पत्रकार सम्मेलनमा नेपाल र भारतबीचका सीमासम्बन्धी समस्या वार्ता र कूटनीतिक माध्यमबाट समाधान गर्न नेपाल तयार रहेको बताएका हुन् ।

एक प्रश्नको जवाफमा उनले लिपुलेक, लिम्पियाधुरा र कालापानी नेपाली भूमि भएको दोहोर्याउँदै यस विषयमा नेपालले भारत र चीनसमक्ष आफ्नो आधिकारिक धारणा स्पष्ट गरिसकेको जानकारी दिए।

“नेपाल–भारतको वर्तमान सीमा सन् १८१६ को सन्धिबाट निर्धारित भएको हो। यी विषयहरू द्विपक्षीय वार्ता र कूटनीतिक संयन्त्रमार्फत समाधान गरिनेछन्। हामी सीमा विवाद कूटनीतिक प्रक्रियाबाटै समाधान गर्न चाहन्छौँ,” उनले भने ।

उनले नेपाल र भारत प्रबुद्ध व्यक्ति समूह (इपिजी) को प्रतिवेदन सम्बन्धित देशका प्रधानमन्त्रीहरूलाई बुझाउनुपर्ने बताए।

अर्को प्रश्नको जवाफमा मन्त्री खनालले नेपालले आफ्ना दुवै छिमेकीसँग सहकार्यलाई प्राथमिकता दिएको बताए। उनले परराष्ट्र नीतिका प्राथमिकता, नेपाल र भारत सम्बन्ध तथा अन्तर्राष्ट्रिय समुदायसँग नेपालको संलग्नताबारे पनि स्पष्ट पारे।

यसैबीच, दूतावासले पत्रकारहरूको सहभागिताप्रति आभार व्यक्त गर्दै नेपाल र भारतबीच आपसी समझदारी र सहकार्यलाई अझ सुदृढ बनाउन निरन्तर संवाद आवश्यक रहेको उल्लेख गरेको छ।