काठमाडौ,२७ जेठ। बर्डफ्लु सङ्क्रमणका कारण कुखुरा तथा अण्डा नष्ट हुँदा प्रभावित किसानलाई सरकारले करिब ४२ करोड रुपैयाँ राहत दिने भएको छ।
पशुसेवा विभागका अनुसार हालसम्म देशभर ५ लाख ५३ हजार ७५० कुखुरा नष्ट गरिएका छन्। प्रभावित १० जिल्लाका ७२ फार्ममा लेयर्स र स्थानीय कुखुरा नष्ट गरिएको हो। यससँगै १० लाख ९०० अण्डा र २ लाख ५ हजार किलो दाना पनि नष्ट गरिएको छ।
बर्डफ्लु नियन्त्रण नियमावली २०७८ अनुसार नष्ट गरिएका पक्षीजन्य उत्पादनको लागत मूल्यको ७५ प्रतिशतसम्म राहत दिने व्यवस्था छ। सोही आधारमा किसानलाई राहत वितरण गरिने जनाइएको छ।
महानिर्देशक डा. उमेश दाहालका अनुसार द्रुत कार्य टोलीले सङ्कलन गरेको क्षति विवरणका आधारमा राहत रकम निर्धारण गरिन्छ भने जिल्लाअनुसार लागत मूल्य फरक पर्न सक्ने भएकाले सम्बन्धित निकायले निर्णय गर्नेछन्।
केही महिनायता काठमाडौं उपत्यकासहित १० जिल्ला प्रभावित भएका छन्। बर्डफ्लु रोगको उपचार नभएकाले संक्रमित क्षेत्रका कुखुरा, अण्डा र दाना नष्ट गर्नु नै नियन्त्रणको मुख्य उपाय भएको पशु चिकित्सकहरूले बताएका छन्।
प्रतिक्रिया दिनुहोस