विपदमा निरीक्षण भन्दा जनताको सुरक्षा प्राथमिकतामा हुनुपर्छ : गृहमन्त्री गुरुङ

काठमाडौ,४ असार । गृहमन्त्री सुधन गुरुङले यस वर्ष मनसुनजन्य विपद व्यवस्थापनमा मन्त्रीस्तरीय निरीक्षणभन्दा जनताको सुरक्षालाई प्राथमिकतामा राखिएको बताएका छन्।

राष्ट्रिय विपद जोखिम न्यूनीकरण तथा व्यवस्थापन प्राधिकरणबाट बाहिरिने क्रममा सञ्चारकर्मीसँग कुरा गर्दै मन्त्री गुरुङले विपद् प्रतिकार्यलाई प्रभावकारी बनाउन विभिन्न तयारी गरिएको जानकारी दिए।

उनका अनुसार आवश्यक परे हेलिकप्टर परिचालनदेखि मोबाइल एपमार्फत पहिरो प्रभावित क्षेत्र पहिचान गर्ने व्यवस्था गरिएको छ।

“हाम्रो लाइन मन्त्रालयले एउटा एप विकास गरेको छ, जसबाट डोजरहरू कहाँ-कहाँ छन् भन्ने जानकारी तत्काल प्राप्त हुन्छ,” उनले भने,-“आवश्यक परेको ठाउँमा तुरुन्तै प्रतिक्रिया जनाउँदै बाटो खुलाउने व्यवस्था मिलाइएको छ।”

मन्त्री गुरुङले आफू विगतमा पनि विपद्का बेला उद्धार तथा राहत कार्यमा सक्रिय रूपमा खटिएको उल्लेख गर्दै अघिल्ला वर्षका कमजोरी दोहोरिन नदिने प्रतिबद्धता जनाए।

उनले विपद्का कारण नागरिकले लामो समय सडकमा अलपत्र पर्नु नपरोस् भन्ने लक्ष्यसहित काम भइरहेको बताए।