काठमाडौ,५ असार । यस वर्षको प्रि-मनसुन अवधिमा ४५ वर्षयताकै सबैभन्दा बढी वर्षा भएको तथ्य सार्वजनिक भएको छ। जल तथा मौसम विज्ञान विभागका अनुसार यस वर्ष औसतभन्दा निकै बढी वर्षा मापन गरिएको हो।
विभागका अनुसार प्रि-मनसुन याममा नेपालमा औसत २२६ दशमलव ३ मिलिमिटर वर्षा हुने गर्दछ। तर यस वर्ष भने औसतको १४५ दशमलव ५ प्रतिशत अर्थात् ३३९ दशमलव ७ मिलिमिटर वर्षा भएको मौसमविद् सञ्जिव अधिकारीले जानकारी दिए।
यसैबीच पछिल्लो २४ घण्टामा झापाको अनारमनी बिर्ता क्षेत्रमा सबैभन्दा बढी वर्षा मापन भएको छ। सो क्षेत्रमा २०८ मिलिमिटर वर्षा भएको विभागका सूचना अधिकारी दिनकर कायस्थले बताए। उनका अनुसार २०० मिलिमिटरभन्दा बढी वर्षा भएमा ‘अति भारी वर्षा’ मानिन्छ।
झापा क्षेत्रमा पछिल्लो केही दिनदेखि निरन्तर वर्षा भइरहेको छ। सहायक प्रमुख जिल्ला अधिकारी तेजप्रकाश प्रसाईंका अनुसार केही स्थानमा खण्डवृष्टि भए पनि ठूलो क्षति वा प्रभावको विवरण हालसम्म प्राप्त भएको छैन।
विभागका अनुसार सो क्षेत्रबाट मनसुन नेपाल भित्रिने तयारीमा रहेको छ। त्यस्तै इलाम, मोरङ, सुनसरी र सिन्धुलीका केही मापन केन्द्रमा पनि भारी वर्षा भएको छ। पश्चिमतर्फ कास्की, लमजुङ र गोरखाका केही स्थानमा समेत भारी वर्षा मापन गरिएको छ।
जल तथा मौसम विज्ञान विभागले सन् १९८१ देखि १२६ वटा वर्षा मापन केन्द्रको तथ्यांकका आधारमा प्रि-मनसुन विश्लेषण गर्दै आएको छ। सोही आधारमा यस वर्ष ४५ वर्षयताकै उच्च वर्षा भएको निष्कर्ष निकालिएको हो।
प्रतिक्रिया दिनुहोस