प्यूठानमा भीरबाट लडेर एकको मृत्यु, करेन्ट लागेर युवक गम्भीर

प्यूठान। प्यूठानमा दुई छुट्टाछुट्टै घटनामा एक जनाको मृत्यु भएको छ भने अर्का एक युवक गम्भीर घाइते भएका छन्।

जिल्ला प्रहरीका अनुसार नौबहिनी गाउँपालिका–६ लुङलेखका ५१ वर्षीय मतबहादुर केसीको भीरबाट लडेर मृत्यु भएको हो। गुल्मीबाट घर फर्किँदै गर्दा लुङलेखस्थित गोरेटो बाटोबाट करिब १५० मिटर तल घोप्टे भीरमा लडेर बिहीबार साँझ उनको ज्यान गएको प्रहरीले जनाएको छ।

त्यस्तै, ऐरावती गाउँपालिका–४ कैरनमा करेन्ट लागेर एक युवक घाइते भएका छन्। पाल्पाको रैनादेवी छहरा गाउँपालिकाका १८ वर्षीय सुधन राना ट्रकको छतमा रस्सी खोल्ने क्रममा विद्युत् तार छोएपछि करेन्ट लागेर गम्भीर घाइते भएका हुन्।

घाइते रानालाई निमतारा पोलिक्लिनिकमा प्रारम्भिक उपचारपछि थप उपचारका लागि पाल्पा रिफर गरिएको प्रहरीले जनाएको छ।