दाङ । दाङमा ब्राउन सुगरजस्तो देखिने पदार्थसहित दुई जना पक्राउ परेका छन्।
जिल्ला प्रहरी कार्यालय दाङका अनुसार घोराही उपमहानगरपालिका-९ चैनपुरस्थित २३ वर्षीय सुरेन्द्रबहादुर घर्ती मगरको घरबाट सुरेन्द्र र घोराही-१८ मसिनाका २४ वर्षीय अरुण घर्ती मगर पक्राउ परेका हुन्।
प्रहरीले उनीहरूको साथबाट ३७ ग्राम २३० मिलिग्राम ब्राउन सुगरजस्तो देखिने पदार्थ, ७९ हजार ५०० रुपैयाँ नगद, दुई थान एन्ड्रोइड मोबाइल र एक थान डिजिटल तराजु बरामद गरेको जनाएको छ।
असोज २६ गते लागूऔषध कारोबार भइरहेको गोप्य सूचनाका आधारमा जिल्ला प्रहरी कार्यालय, इलाका प्रहरी कार्यालय नारायणपुर र अस्थायी प्रहरी पोष्ट बसपार्क घोराहीबाट खटिएको संयुक्त टोलीले घरमा खानतलासी गरेको थियो।
पक्राउ परेका दुवै जनालाई अदालतबाट १२ दिनको म्याद थप गरी थप अनुसन्धान भइरहेको प्रहरीले जनाएको छ।
प्रतिक्रिया दिनुहोस