जंगली च्याउ खाँदा दुई बालबालिकाको मृत्यु : एक गम्भीर

चितवन,३ जेठ । जंगली च्याउ खाँदा चितवनमा दुई बालबालिकाको मृत्यु भएको छ। एक जनाको अवस्था गम्भीर छ।

चितवनको इच्छाकामना गाउँपालिका–१ कुलबाङगका ९ वर्षीया नमुना चेपाङ र ११ वर्षीय सञ्जय चेपाङको मृत्यु भएको जिल्ला प्रहरी कार्यालय चितवनका प्रहरी नायब उपरीक्षक रवीन्द्र खनालले जानकारी दिए।

उनका अनुसार नमुनाको जेठ १ गते मृत्यु भएको हो भने सञ्जयको शनिबार राति उपचारका क्रममा मृत्यु भएको हो।

प्रहरीका अनुसार वैशाख २९ गते श्यामबहादुर चेपाङको पाँच सदस्यीय परिवारले जंगली च्याउ सेवन गरेका थिए। च्याउ खाएपछि परिवारका सदस्यहरू बिरामी परेका थिए, जसमध्ये तीन जनालाई जेठ १ गते उपचारका लागि भरतपुर अस्पताल ल्याइएको थियो।

हाल १३ वर्षीया मनिता चेपाङ भरतपुर अस्पतालमा उपचाररत छिन्। उनको अवस्था गम्भीर रहेको प्रहरीले जनाएको छ।घटनाबारे प्रहरीले थप अनुसन्धान गरिरहेको जनाएको छ।