दाङ,१ साउन। सवारीचालक अनुमतिपत्र (लाइसेन्स) लिन तथा नवीकरण गर्न चाहने सेवाग्राहीले अबदेखि अनलाइनमार्फत नै राजस्व भुक्तानी गर्न सक्ने भएका छन्।
यातायात व्यवस्था विभागले शुक्रबारदेखि लागू हुने गरी लाइसेन्ससम्बन्धी अनलाइन प्रणालीमा राजस्व भुक्तानी सुविधा थपेको हो।
विभागका सूचना तथा प्रविधि निर्देशक केशव खतिवडाका अनुसार यसअघि सेवाग्राहीले अनलाइनबाट आवेदन फाराम मात्र भर्न सक्ने व्यवस्था थियो। अब भने सोही प्रणालीमार्फत राजस्व पनि भुक्तानी गर्न सकिनेछ।
नयाँ व्यवस्थासँगै सेवाग्राहीले बैंकमा पुगेर लाइन बस्नुपर्ने झन्झटबाट मुक्ति पाउनेछन्। यसबाट समय र खर्च दुवै बचत हुनुका साथै सेवा प्रवाहलाई थप छरितो र प्रभावकारी बनाउने अपेक्षा गरिएको विभागले जनाएको छ।
प्रतिक्रिया दिनुहोस