दाङमा तीन थान भरुवा बन्दुक बरामद

दाङ। प्रहरीले दाङका विभिन्न स्थानमा लुकाइछिपाइ राखिएका तीन थान अवैध भरुवा बन्दुक बरामद गरेको छ।जिल्ला प्रहरी कार्यालय दाङका अनुसार विशेष सूचनाका आधारमा असोज १९ र २० गते खटिएको प्रहरी टोलीले बंगलाचुली र लमहीका विभिन्न स्थानबाट ती बन्दुक बरामद गरेको हो।

प्रहरी चौकी हाँसीपुरबाट खटिएको टोलीले बंगलाचुली गाउँपालिका-५ पाँचपोखरीस्थित न्यू कालिका सामुदायिक वनको झाडीमा लुकाइराखिएको अवस्थामा दुई थान भरुवा बन्दुक फेला पारेको थियो।

त्यस्तै, अस्थायी प्रहरी पोष्ट रिहारबाट खटिएको टोलीले लमही नगरपालिका-९ तिलियास्थित आमखोली सामुदायिक वनको झाडीबाट थप एक थान भरुवा बन्दुक बरामद गरेको प्रहरीले जनाएको छ।

बरामद भएका हतियार कसले र कुन प्रयोजनका लागि लुकाएर राखेको थियो भन्ने विषयमा प्रहरीले थप अनुसन्धान गरिरहेको जनाएको छ।